المساعد الشخصي الرقمي

مشاهدة النسخة كاملة : عرس ليبي صح


الجليلة
2008-12-17, 02:39 PM
جو العراس من الاخير تعالوا نضحكوا شويا

البداية :



غريبة كيف أنساني .. غريبة وانا في قليبه الحبيبة غر كيف أنساني غريبة حبيبي أنساني ... تصفيق وغني وصوت وعالي في منزل الحاجة فاطمة بمناسبة زفاف كريمتها (( ليلى )) ,,,

سمية خشت بالمترد اللي فيه البيتي فور .. هاتي سمية أعطي مهند طرف اللطف خيرك بخيلة ... تي اسمعي يا نورية كلمي سمية تعطي بنت اختى ناريمان طرف اونها تحت الطاولة تبكي ... يا فوزية يا فوزية ولدك ايعيط ضربه انور ولد سالمة وسمعت قالوا ضربه بي عصا علي راسه .... ووك عليا وليدي وينه وطلعت واتشوف برا الخيمة يا احمد شوف خوك قالوا ضربوه ...

انعودوا للاغاني

مع الطرابلسي هايمة مقعمز على الكرسي هايمة مع المصراتي هايمة شاريه بحياتى هايمة مع الورفلي هايمة راجل ما ايولي هايمة ... ناضت فدوى ترقص ... مبروكة ونجلاء ايقرموا : زعميتها تعرف ترقص تعرفي يا نجلاء والله البنت هادى كارهتها في الدم .... حيه حيه حيه وزغرودة قوية من انتصار صديقة ليلى العروس وخشت ترقص حتى هيا ... جيبوا العصير اللطف شن هالبخل باهي اللي مش عصير المزرعة والا فوستر واحنى اقريب انموتوا بالعطش وهوا اعقاب عصير براميل >>> هذا صوت من بنت ما نعرفهاش ... جاية اتنق وخلاص ,,

يام يما يا امى >>> على ايضبح على أمه من برا الخيمة اسمعى يا بنية ضبحيلي على امى .. وجت أمه : اه يا وليدي شن فيه .. قالك بوي روحي ديريلي لعشي .. باهي يا اوليدى قوله انى جاية .. على فكرة روحت بعد 3 ساعات من امتى ولدها قاللها بوي يبيك .. نهارها الأحرف ,,,

اسمعي يا ندى نوضي دخلي خوك الداخل اونا ملوح تحت الكرسي اللي مقعمزة عليه سالمة ... روروروروروي هيه هيه يا حبي .. حلوة زي هيفاء وهبي ... حلوة زي عينها مش عارف وين طاح فيها ... قرمة من بنت ما نعرفهاش اذم في العروسة ...

دنيا نايضة حاولت انشوف حاجة في الخيمة حلوة ما القيتش الا اغنية قيموا القيطون احميتونا خلوا الشباب ايشوفونا

(( واحد) مكسد برا الخيمة ويراجي امتى ايقيموا القيطون

بنت توكره
2008-12-29, 02:52 AM
امتى نختصرو هذاااااا كله وتكون مناسبتنا بسيطه ومريحه..... مع كل هذه الدوشه والمصاريف والتعب مافيش حد مستمتع كله خساره فى الجهد والجيوب وصحيتى اختى الجليله على هذا اموضوع الى طالما تعبنى وانا نحاول نغير منه فى محيطى وعائلتى .... تقبلى تحياتى

بنت لندن
2008-12-29, 02:59 AM
هههههههههههههههههه والله شوقتيني نحضر عرس في ليبيا بس الباين حلو والله ومشكوره اختي الجليله علي الموضوع الحلو اختك بنت مانشستر تصدقي خاطري نحضر زمزمات

الرحالة الصغير
2008-12-31, 04:29 PM
السلام عليكم
الجليلة كانت معنا في نقل حي ومباشر لي أحد الاعراس الليبية التي تبين أهم العادات الشعبية
الموجودة في المجتمع الليبي هههههههههههههههههههههه
مشكورة الجليلة على هذا النقل المباشر لهذا العرس بما فيه من قرمه وزغاريت وغناوي
مع تحياتي

الغزال الشارد
2008-12-31, 05:55 PM
هههههههههههههههههه تتتتهههههههههههههه
مشكورة اختى الجليلة على هدة التغطية الحية والمباشرة من امام الخيمة الفرحية
هههههههه

مع خالص تحياتى

الجليلة
2009-01-13, 05:18 AM
هلا بنت توكرة
وكان الله في العون ستستمر المعاناة الليبية
والتقليد اعمى كما تعرفين فيزداد الوضع من سئ لا اسوء
ودمتي بود

الجليلة
2009-01-13, 05:20 AM
هلا بنوتة
اكيد ترجعي لبلادك بالسلامة وتحضري الزمزامات والنجمة الطرابلسية للصبح
وعاداتنا وتقاليدنا الحلوة
ورب يرجعك سالمة
ولا تغيبي عن متصفحي

الجليلة
2009-01-13, 05:21 AM
الرحالة باش تعرف
ديما مواكبين الحدث والتغطية مية مية ههههههههه
ودمت بخير

الجليلة
2009-01-13, 05:23 AM
هلا الشارد
ولا ننحرم خفة دمك وتواصلك
وربي يحضرني افراحكم يا ربي
ودمت بود وما زال العرس مستمرا

صلاح حمد
2009-01-13, 03:43 PM
مشكورة جليلة واللة موضوع حلو اكيد انتى حلوة ودمك زى العسل

الجليلة
2009-01-13, 04:39 PM
الله يسلمك
وربي ما يحرمني تواصلك صلاح الحمد
اول مرة تزور متصفحي ويا ربي بالصحة عليك

السنفور
2009-01-14, 03:07 AM
أهلين اختي العزيزة والغالية
شكرا علي هده الروعه والتميز
ربي لاتحرمنا منك يا زعيمة
تقبلي مروري

الجليلة
2009-01-14, 03:19 AM
هلا بالسنفور الحلو
التميز عندك وفي مواضيعك يا مشرف الانترنت والصور
وربي لا يحرمني تواصلك يا حلو مصراته

المحامية
2009-02-21, 12:46 AM
الجليلة
هههههههههههههههههههه
تسلمي علي القصة الحلوة
والله عرس صح
هههههههههه
تقبلي مروري

الجليلة
2009-03-07, 07:50 PM
هلا المحامية
بل اكثر من هذا هههههههههههه
ودمتي طيبة

ولد بنغازي
2009-03-12, 12:33 PM
هههههههههههههههههههههههههههه

السلام عليكم

مشكور على الموضوع وبارك الله فيك

وتقبلي مروري

الجليلة
2009-03-12, 01:46 PM
ربي يدوم الابتسامة

ومنور متصفحي ولد بنغازي
ودمت طيب

دلوعة
2009-03-13, 05:17 PM
ههههههههههههههههههه
بنكمل الحكاية لوسمحتي ياجليلة ...
الدنيا مقلوبة تزغرط ودربوكة والزمزامات مبحوحات .. شوية سمعوا صوت السيارات وخشت مجموعة نساوين
لوحوا فراريشهم من الباب .. يامبروك علي غالينا هذا وين اتسمت لينا ...أمك جاباتك ليلة عيد اللي تزوجتي هالصنديد ..
صنديد عينها وهو عين تقلي وعين تصب في الزيت ... هادي بنت عمة بو العروسة اللي عمرها ماشافت العريس ..
وأخته ترقص في نص الخيمة وتغني ...كنك جيتي في عفستنا هو خونا وإنت وخيتنا .. حيه حيه يلا ايديكم يابنات ..
الحاصل الدنيا زحمة وأم العروسة عرق تقطر وخواتها شعرهم ضارباته الرطوبة مشوا بيطلعوا العروس للسيارة
ما تنسيش السكر اللي بترفعه أختك ... عمتها تعيط علي أختها الصغيرة وصلوا لباب الخيمة والعروسة تبكي وخالاتها يجروا وبوها برا يشوف في أولاده يفرقوا في الروزاتة والعبمبر علي سيارات حوش العريس ..وركبت العروسة للسيارة هي في الوسط وعمتها الكبيرة علي يمينها وخالتها علي يسارها ...وقاطعين عليها النفس .. لكن عادي تتحمل كلها دورة في الساحة الخضراء وطريق الشط وبعدين يوصلوا لحوش العريس في عين زارة ..
توا كملي إنت ياالجليلة وسامحيني لأني كتبت معاك لكن الموضوع عجبني وماقدرتش نقاوم ..

الجليلة
2009-03-14, 01:53 AM
بعد الدورة في الساحة الخضراء نزل العريس وهوا وعروسته وصوروا بحذا الغزالة اللي بتموت من الشر والعطش في الساحة الخضراء عرفتيها اكيد يا دلوعة ههههههه
وصار تالقرمة يا وبي ناض ولد عم العريس قال بكل شن خفاف شوف وين يصوروا وقتاله مرته يريتها غير حلوة حتى اني ما درتوليش هكي الدنيا حظوظ
وركبوا السيارات من جديد وبيب بيب
وكرهبنا دارن سربوط ان شاء الله لا حادث لا موت
هوينا خالد يسطرب بالسيارة قريب داروا قول خالد طبعا خوا العروسة
ونزل عمه وبدي يعيط عليه وستف السيارات من جديد وسكسكه يمين واعر كان سطرب يروح بالعروسة ههههههههههه
المهم خشوا للخيمة وزحمة وزمزامات ووقفوا بنات العيلة نسرين وايناس وعواطف يزغرتوا ويغنوا مرحبا يا لافية بحضور العافية
مرحبا بمرةخوي اللي معمرا حوش بووووووووووووي
المهم خشت العروسة وخشمها فوق ومش عاجبها الوضع زحمة هلبة وما فيش نظام
وصاحبتها ليلى شادة الفيالو من تالي لانه ايجار وخايفة من الغرامة
وصار الحكي قروب مقعمز في الطاولة الاولى جيران حوش العريس قرمة رسمي
حيه غير شوفي الكندرة والله الا متع نادي الاتحاد سكا بضاعة سورية
بكل شينة هوا احلى منها غير شوفي فيلوها قداش زمني العفو ومكياجها حالة الكريمة سايحة وعار التاكم
والله هوا احلى منها خسارة كان خدي بدرية بنت جيرانا خيرله فالحة وحلوة وتحبه غير هوا فاتها يدير في الجو

واحدة من طاولة تانية من المعازيم باهي اللي جت العروسة باش مدوا كمشة العبمبر والروزاتا العفو ريقنا يبس
ويا ريته غير عمبر العالم والا الحاراتي عمبر بالكاكاوية طيح سعد عارهم والرزوتا عادية يا ريتا غير حليب لوز العفووووووووووووويا ربي

بيب بيب السيارات برا زحمة وتعارك خالد خو العروسة مع ولد عم العريس برا خاشة بعضها وصاروا الرنات اللي هذا يقول لمرته يلا سقدونا
ههههههههههه
والزمزامات يغنوا حصلها يا عليك ذهيبة خير من الف اجني في جيبه
ناضت بنت خالة العريس ذهيبة طياح السعد وهيا شينة وما تكسب ذرة ملح العفوووووووووو
كان خذاني مش خيرله
ههههههههههههههههههههه

يلا دورك دلوعة لهني اني وصلت
ودمتي طيبة

دلوعة
2009-03-14, 01:27 PM
ههههههههههه
الدنيا مقلوبة والخيمة سافيها علي مافيها خايضة بالصغار والكبار ...
وقفت العروسة في الكوشة اللي مدايرها عليوة ولد عم جيران العريس ماهو عنده محل تأجير كراسي وكوش .. الحاصل العروسة واقفة تبي تسلم علي أمالي العريس جت خالته سلمت .. وبعدين أخته ...وعمت الكبيرة والوسطية .. أما عمته الصغيرة ما جتش حازنة مع حماتها راجلها مات ليه 8 شهور ونص وماتقدرش تخش للعرس بعدين يبهدلوها أمالي راجلها .. المهم العروسة تسلم عزوزتها واقفة في آخر الخيمة من غااااااااادي بحدا باب حوش جيرانهم اللي مسكرين عليه بالقيطون ... نزلت العروسة تكر في هذاك الفيلو وخشت من بين كراسي المعازيم وسلمت علي عزوزتها وباست علي رأسها ... وهي مولية لكرسيها عثرت عثرة قريب جابت أجلها ... قولوا وصلت للكرسي .. جابت خالتها سكرية السكر وبدت العروسة توكل فيهم .. وقفوا طابور ماهو طابور كان شوية 20 مرأة .. وحتى من الصغار وكلتهم ..
هي توكلهم وهم يوكلوها .. وكلهم من نفس الكاشيك ويا ويلها كان تتكلم .. شن هازية عليه وتحساب ما عنداش ناس وإلا شني .. حتى ساسية بنت أخت مرت خوهم جت وكلتها السكر ...
وأمالي العريس بدوا في التفريق شاهي وحلاوات .... طيح سعدهم شاريين حلالوات ربع جنيه ... غير ضوقيهم تحسيهم منديات وفيهم بنة أخي نقولك حاجة كمكميهم في الكلينكس وحطيهم تحت الكرسي .....وااااك الشاهي بارد ومر .. طيح سعدهم غير علي شني ينفخوا وهم كل شي امدايرينه ايحشم ...
شوية وقالوا زفة العريس بدت وما نحكيلكش عالجو ..
فاطمة وأسماء وليلى وعايدة كلهم مشوا يتجاروا يدوروا في نقبة في الخيمة باش يبيتوا منها
والشباب برا يوتوا في روحهم معبيين برويطة بياض ويسخنوا في البنادير ...
هي جليلة كملي الباقي عليك ...

الجليلة
2009-03-14, 06:33 PM
هههههههههههه
برا مدايرين مالوف مش عادي ويغنوا الحب لو معنى اااااه
اليف الف يا سلطاني والهجران اكوني اليف ..............
المهم شفتي اسما قداش تبيت من الخيمة وقريب النقبة يخلوها روشن ويشبحوا في الشباب اللي برا
ناضت نرجس قالت لصاحبتها نرجس بنت عم اللي مأجرين منهم الخيمة المتنقلة
قاللتها شوفي عمر البورا هههههههه صاحبي شن لابس حيه عليا يهبل وواقف بحدا خوي كان يندري عليه يقتله هههههههههه
المهم البرويطا معبية بخور وريحة العريس قالبة الدنيا وهذاكي الزهر والختو لوح والبندايروتليثت اكرم ولد خالة العروسة تهبل ع البندير الدنيا برا مقيومة
حسام يغني هلي طول رقبته فرحان ماهو العريس صاحبه هلبة
المهم الداخل العروسة مقعمزة وجوها متوتر من الشبحات والبودرة نسوها في شنطة عفاف وعفاف روحت وما حضرتش الدخول علي خاطر ولدها خذي بردة قوية منها في الخيمة البارح في النجمة وهوينا في المختار بالاكسجين
العروسه تكلم في صاحبتها نسرين شنو نسرين مكياجي حلو سويلي الفبالو بالله عليك
كبدي دارها من السكر لين بنرجع
واسمعي اقرلي قران مرات مدايرلي كتيبة والا حاجة نقعد نعاني منظرهم حالة شوفثي الحسد في عيونهم
جت حنان تمد في المية
ناضت وحدة من طاولة شربت وقالت واوووووووووو ريحة الكيسان مزفرة دحي البعيدة غير شوفي الكاس بروجه العفو العفو .......
وعثرت حنان بالمية وبزعتها علي قفتان اخت العروسة شاريته 1000 جنية ومخيطته عند كشمير غير بس القماش كلف الشيئ الفولاني ..... شبحتلها شبحة تقتل قالتلها عميا ديري عيون
قالتلها تعمي عيونك اني مش قصدي وصارت عركة وكبرت وبدي الضرب في الخيمة كلها
والعريس قريب يخش والدنيا مقلوبة
ناضت ام العريس تقول كتيبة كتيبة عين عين
هههههههههههه
وقفت خولة بنت جيرانهم قالت نعرف علي منو يقصدوا بالكتيبة هيا يا امه نوضي بنروح اني
هههههههههههههههههههه
كملي دورك توا دلوعة

دلوعة
2009-03-15, 04:50 PM
ههههههههههههههههه
والدنيا مقلوبة ضرب وعراك جت أخت العريس كميلة ....
قات غير صلوا عالنبي ياعويلة هادي عين وصابتكم ...خالتي أمناني والنبي تقعمزي علي خاطري أمي والله ماتقصد حاجة ... والكلام اللي قالاته عالكتيبة كله من التفلويش والتلخبيط ... توا تسمعي في كلام بنتك خولة ..إنت تعرفي أمي حاسباتك وخيتها ...هيا العريس قريب يخش ويأخذ عروسته ...
وااااااااااااااااااااالله كان مش علي خاطرك ياسعيدة مانقعد فيها دقيقة... هاني قعمزت ...أجبر بخاطرك .
العروسة نزلولها الطرحة وأختها واقفة بحداها وعمتها في الجهة الثانية وخالتها تهدرز مع بنت عم العريس .. ماهي بنت بنت حماتها خيرية ... صوت المالوف قرب والتدريجة وصلت وأكرم يثلت بالبندير واخته سالمة من داخل الخيمة ...الله واحد .. صمد .. ربي ماكيفه حد .... توحد لما تشوف الزين .. توحد راك تأخذ بالعين ......رورورورورررررررررري ..
النساوين اللي في الخيمة لبسوا عباياتهم وغطوا روسهم ماهو العريس بيخش ..
وبدوا الشباب يقروا في الفاتحة ... وعليوة خو العريس شاد جرة يبي يكسرها وراء خوه لما يخش ..
هههههههههههه
هيا جليلة كملي ...
المفروض واحد من الشباب يحكيلنا شن صار في المولد في خيمة الرجالة ...

الجليلة
2009-03-16, 03:03 AM
روروروري ري
يا مبروك عليه الشيخة وافتكينا من تكشيخة
برا يقروا في الفاتحة والبنات يدعوا ايناس وعبير ولمياء كلهم يدعوا يا ربي اجعل حبيبي من نصيبي
وخوه كسر الفرخية بالقوا وصار طلقة برا بالكلاشن كوف لين انخلع العريس وعثر عثرة لين الكندره تنحت
وصار الضحك ثريا بد ت تضحك وقتله بشويا منور يا عريس
وخش وصار التعليق
اسما قالت لبنت جيرانهم غير شوفي بدلته نفسها متع البيان العفو شن بخيل واصلا القرافا لونها شلافطي ع الاخر ومش ماشية مع السوريا بكل يا نااااااااااااااااري وجعني مرته اطوف من الاخير
والعريس في طريقه لعروسته وهيا واقفة ع الكوش تستنا
امشي اضبطته خالتك حورية امه وقعدت تبوس فيه وتبكي وهوا يبوس علي راسها ومستعجل
شوي جت خالته ومرة خوه وبنات خلاته كلهم باسوه وباركوله وتكنطت العروسه منهم
ههههههههههههه
وتوحد لما تشوف الزين توحد راك تاخذ بالعين
قالت بدرية بنت خالتك روحيه بالله منين بيجيك العين يا معوج الرجلين
بكل شن خفيف
وبدوا البنات يغنوا مبروك علينا وعليكم انتو لينا واحني ليكم
يا فايح يا عريق الحنا يا سعد اللي جنس منا
المهم يغنوا وصار فيها ام العريس تبخر في ولدها عربية خايفة من الكتيبه
هههههههههههههه

شوي العروسة تعفلقت وقالتلها خلاص خنقتينا بالبخور
شوي تعفلقت العزوزة وقالتلها كان مش عاجبك سكري خشمك بنيخر ولدي اني
المهم قالتلها اخت العروسة بخري غير راك تحرقي الفيلو حاطين رهينة حديدة مدفع هههههههههه
حقه 3000 الالف قالتلها شن دافعهم راجلك ما هو دافعهم ولدي
يلا سكري فمك
وصارت عركة وبدي العريس يهدي في امه والناس تتفرج
والعروسة خافت وسكتت خايفة من ردة فعل العريس
وبعدين ناضت خالت العروسة خالتك بهلولة قالت لا غلط هكي كان بوها راجل ما تباتش عندهم الليلة
هههههههههههههههه
كملي انتي دلوعة عيت
راهو زحمة

حنيش المغامر
2009-03-16, 03:41 AM
هههههههههههههههههههههههههههههه

مشااءلله علايكم ياا جليله ودلوعه قرمه وطيااح ياااااااااااااااااا


هههههههههههههههههههههههههه


المهم في خيمه التريس العريس يجي يبو يبركوله النااس المهم في واحد يصووور فيه

شو قاله خووو معش تصورة ياا راجل قااله حوال خيرك انت شو قااله العين واجدة توا تصيله شي ولا حااجه

قتله شن بيصيله خليه يصورة شنو فيه شوي قالي خويا وحر فيه المهم جي العريس خيركم ياا شبااب قتله يااراجل خوك ميش حد يصورك شوي قاله عدي شووور امك ياااا ساالم ورد علي هههههههههههههههههه


كمل عني واحد منك شنو صاار عيت


دلوعه الجليله خبرني بي التفصيل واني نخبركم بي التفصيل

هههههههه


تحيااتي

بنت لندن
2009-03-16, 11:34 PM
ههههههههههههههههههههههههه
هدا كله عرس ليبي والله جبتوه في خاطري
عمري ما حضرت عرس في ليبيا
تعالو شوفو عرس ليبي في بريطانيه هدوء ومعزيم شويه
والناس ما تخشش لصاله الا بلبطاقه ونضام
والصاله يحجزوها ساعتين او ساعه فقط ويكون في الصبح
في الليل ازعاج يسمعو موسيقه عاليه غير السبت او الاحد يجي البوليس طول
المهم اعزموني في اول عرس نحجز اول طياره ونجي
مشكوره اختي الجليله ويعطيك الف عافيه
تقبلي مروري

دلوعة
2009-03-17, 01:16 PM
ههههههههههه
مانشسترية عرس أختي في الصيف .. تعالي مرحبتين بيك ..ومن قبل العرس بإسبوعين باش تحضري كل شئ ..
والعرس في بريطانيا فوتيه لأنه مايجيش حتى حفلة نجاح وإلا طهور عيل في ليبيا ..هههههههههههههه ..
المهم كبرت الحكاية وبدو الناس يهدوا في خلتك بهلولة والرجالة من برا ينشدوا شن فيه ...
مشي قالتلهم جارة العريس ما فيه شي عوينة وصابتنا ...
المهم الدنيا زحمة والمعازيم كلهم واقفين وخلتك بهلولة طاح منها الوشاح والرطوبة ضاربة شعرها موصلاته لسابع سماء .. العريس جبد العروسة من إيدها وطلع بيها يجري لين عثرت مرة ثانية وما باش يوقف لين وصل للسيارة .. خوه عليوة يدف في الأولاد اللي برا .. يبي خوه يركب بسرعة والعريس ركب العروسة وجي بيركب هو مشي شده مصباح ولد عمة بوه قعد يضبط فيه ويبكي ..
والله وكبرت ودرت مرا يا مخنن ... ريتوه اللي يشوفه وهو صغير ما يتوقعاش يكبر ويدير عقل في رأسه ..
والعريس يجبد في روحه منه لين تقطع الفل اللي ملبسينهوله في رقبته ..
المهم وبعد مارويحته قريب طلعت فك روحه من مصباح وركب السيارة وولعها وعينك تسلم من العمي ..
ماهي ماكسيما ... شوف الطلعة اللي طلعها بيها .. وعبسلام ولد خال بوه متكنطي لأنها سيارته عاطيينهاله في الجيش وهو خايف عليها ..
العريس مشي .. ورجالة حوش العروسة ركبوا نساوينهم وتوكلوا ... وبو العريس قعد يلم في الكراسي ويشوف في قداش واحد تكسر ... وولاد الشارع شدوا الأنقولي وطاحوا فيها تقريم ..
أم العريس وخواته ...
هيا هيا يابنات خلونا انضموا الحوش ونرتبوه .. راهو غدوة عندنا محضر كان نسيتوا ...
محضر شني اللي تحكي عليه هادي .. كان دخولهم يقهر مازال بيديروا محضر ..
هادي ليلى بنت مرة بو راجل حماة كميلة أخت العريس ..
محضر معناها الجو مليح وقر .. نوضي خلينا نبدلوا حوايجنا ونرقدوا شوية .. شن مازال عالفجر ... ممكن ربع ساعة ... نصلوا ونرقدوا ...
الساعة 5 ونص الفجر ويجي عمك الضاوي عم العريس جايب هذاك السفنز في قراطيس كبار ...
تعالي يامنوبة ياأمناني خوذوا مني السفنز .... جبتلكم 100 سفنزة بالدحي و150 سفنزة من غير دحي ...
نوارة نوضي الصغار خليهم يفطروا ..
علي أساس الصغار رقدوا ....
هيا جليلة كمليلنا المحضر ...
وهيا شباب أحكولنا عالعرس من يوم القفة .. وما تقولوش مانعرفوش لأنه العرس الليبي مافيش ما أسهل من الحكي عليه ....
يللا نبو نعرفوا شن صار في خيمة الرجالة ... ساعدوا حنيش قعد بروحه ..

الجليلة
2009-03-21, 12:19 AM
ووواك عيت من تقريض البصل مش كان دارو سواني من سموعة والا من امال الزرقاني مش خير خير ما حصلنا اليوم
هذي نعيمة بنت عمة العريس
والله ما عاد حد يدير في في المسقي غير حوش خالك شلافطية شن بنديروااهو يوم ويمشي تعرفي العرب ما يعجبهم عجب ولا الصيام في رجب

يلا انتي وهيا سقدي روحك ما زالت المحشي يبي الرز والمبطن يبي القلي سقدوا روحكم
ناضت سميحة بنت جيرانهم قالت العفو جيبونا كمشة كعك مالح وحلو نعدوا بيهم الشاهي عرس الهدا والرقاد بلا مخدة المقروض الي اليوم بتمدوه في المحضر تضربي بيه يهودي يستسلم والله قلت لا ام العريس اشري سويسرول العالم مقروض يهبل بالعسل الحقاني غير هما عناد وتسكير راس وبخل

ناضت عويشة بنت اخت العريس هذاكي بنت حلومة تغني في حوشا نبوا نديروا محضر الحبيب يحضر والعدو ما يحضر
هههههههههههه
جت خالتك سويلمة قالت يا بنات وحدة منكم تنوض معاي البكلاوة تبي القصان وشريتلها بيكوات هيا وحدة تنوض تعاوني
ناضت وداد بالله يا خالتي سويامة ما تنسيناش في الحواشي وصار الضحك
وريحة البصلة قالبة الدنيا شوراه بصل سوق الثلاث كله شروه والقرعة الحمراء

بالله صبي الزيت في الليان خلي يسخن نبي نبدا في قلي المبطن راهو الساعة خمسة بنطلع حاجزة عند شبلية مكياج وتسريحة ورحمة بوي ما دخلني فيكم
هذي خويرة بنت خالة العريس
والله هذا كله علي عيونه الباقي خواته وامه وحق ربي يجوا مبدلين واتين وما عمرهم قاموا حتى الطاسة
امشي سمعتها مريومة اخت العريس
شوي جتها وقالتلها الله المعظم ما عاد زايدة فيها حاجة تقرمي فينا في حوشنا يلي لا تستحي ولا تتحشمي وانت تاكلوا الغلة وتسبوا الملة تفضلي امشي لمزينك وما نبوش منك شيئ الله لا تسامحك تساعدينا في حاجة
قالتلها شن تلزي فيا طبعا ماهو كملنا توا شن بديري بينا
وكبرت الحكاية وصار علو الصوت وناضوا البنات يحزوا وخلتك مريمومة تتحلف وهذاكي خذت جبتها وقالتلها هاني مروحة قعمزي فيه
ميتة غير علي عرسكم والا تبلبيزكم
هههههههههههههههه
هيا كملو ا دهشت

حنيش المغامر
2009-03-21, 02:40 AM
هههههههههههههههههههههههههههههه

والله ممت من الضحك يااا الجليه

هههههههههههههههههههههه

حتي الكلام الي نبي نقواله ودرت من الضحك

توا نجي ونخبركم بي التفصيل لن وينكم يااا شبااب

الجليلة
2009-03-22, 02:00 AM
لا حنيش اتفقنا انك ح تكتب شن صار في خيمة الرجالة
هيا نستنوا في الاحداث اللي برا

حنيش المغامر
2009-03-23, 12:44 AM
ايوة.... بالصلى ع النبى

اول بالبادى فتلكنا عاد هذيك السورية العربية ..اندور فى البنة معاش القيتها

الثانى بالثانى..قلبش الادراج معاش القيناها ... صبيت من البارزيتا اوخلااص راد الله على

المهم اسقدت شور العرس وخشيت عاد للمربوعة ..القينا الحلوفات يربخن والطلااقات يرقن ..

الحاصل اثنين م الشياب الغبر لوينهم متعاركين ...واحد ايقول لى ..والاخر يقول لى ..

يا جماعة غير بشواش منو هالى لة ومنو هالى ماهى لة ...

اينط الشايب الاول واشنابة دارات شوط ماصار بكل ..دومان هنبر ..قالى ياليد لوكانهى لى ..

عجبتنى ناخدها طول.. اينط الاخر ومافى فما اولا سن...ابدا ما ايصير هالكلاام..

الشايب لول قالى اسمع ..قالى رانى نرجا فيها من الاسبوع هالى فات ..

الشايب لااخر قال ..انا اتجينى فى المنام ...

ايوةةةةةةة صارت فيا حالة هالشياب متعاركبن على حاجة وشكلها .... حاجة تسوة

ضربت فى راسى قلت انا ازعمك شن تطلع ؟؟؟؟؟

الاول قال والله ناخذها ونهرب بيها ...

لا لا لا لا لابييصير فية القتل ....ان كيدهن لعظيم

والغريب ان الجماعة هالى فى المربوعة ما فيش حد يبى ايتكلم !!!!!

قتلهم يا جماعة غير بشواش توة انتعشو وبعدها ايصير خير ....

ركبنى الوسواس ..من الاخير يا جماعة هالشياب عليش متعاركبين ؟؟؟

لاحول الله ............ ان كيدهن لعظيم ..........

نسمعو فى صوط الزغاريت يدقلن عند الصبايا ... والخط او لوح يطربق..طاف طاف

وانا قعدت نرجا فى هاليلة السودا..لين امتى اتم ...

المهم جاء العشاء واقربو السيايب من بعضهم ..اا قلت خلااص تبى اتك توة ...

الغريب انهم تقابلو او يرجو فى العشاء ...

واقعدو يهمسو ..توة انوريك والتانى توة انوريك انتا ...

خشن القصاعى ...حطو قدامى انا والجماعة هالى معاى قصعة

والشيايب عطوهم قصعة .... تاريت شن صاير

الشياب متعاركين على الحمة الكبيرة ....ههههههههههه

ايوة ايوة صار هكى انتم من امبدرى متعاركين على الحمة وانا نحسابها ....

شبحت روحى وقعدت نضحك فى وسط المربوعة ...

والشياب ايشوفو فيا وايقولو هاضان انكلب شكلاا

هههههههههههههههههههههههههههههههههههه

الجليلة
2009-03-23, 02:12 AM
ههههههههههههههه
حلوة مغامر اللقطة الريحة اللي انت ادور عليها سارقينها الصغار من دولابك وبخوا بيها حوش العروسة لما جواااا
المهم برا خالتك منوبة تسمع في هذواكي الطلاقات وقالتها تعالي يا نوارة عمك امحمد بيطلقني علي خاطر لحمة حطي خروف كامل وفكينا من المشاكل سلم وخيتي قالتها من عيوني التنين هذي فرحة العمر قريب ننحروا جمل احني مش غير خروف
المهم برا المربوعة صوت الزغاريت وصوت الصغار يتعايطوا ها ها ها ردي بالك الطنجرة تبزع علي الولد غبر فيك يا بدرية ينحرق والله بوه يطلقني ردي بالك عاد
جت خالتك سويلمة يلا يا صبابا نووضوا نغسلوا المعاين يلا انشطوا ربي يقوي سعدكم سلم بنياتي
ههههههههههههه
يلا كملوا امعاين العزومة يبوا الغسل يلا يا صبايا المنتدى الهمة

دلوعة
2009-03-27, 02:13 AM
المهم خالتك سويلمة جت وصياحها واصل لخيمة الرجالة ... ناضوا الصبايا يغسلوا في هادوكا المَاعين وداروا جو مش عادي ...
ياللله العقبة ليها .. نوبة بن عمران تجيها ..... أريج بنت الجيران اللي واخدين حوشهم للتطييب ترقص وأروى وأميمة يصفقوا لين إيديهم طابوا ...وخالتك سويلمة تأكل في الكسكسي .. وين المسير يابنات والله ما تغديت راني بنطيح من طولي ...خالتك أمني تسَتف في المَاعين ومعاها خالتك الخامسة الطيابة يتشاوروا عالعشي والبنات كملوا المَاعين وسيقوا الجنان ومشوا بيوتوا روحهم للمحظر ..
فطومة بنت الجيران جاها صداع قوي مشت إدور في حبة بنادول وماعرفتش الصداع من شن جاها ..
معقولة ماعرفتش من شن الصداع وهي مدايرة لشعرها دوامة من ليلة ألبارح ....
مبردها هادي هند بنت خالة بنت عمة خال العريس ..جاية تساعد زعميتك ..
المهم مشوا البنات يوتوا في روحهم للمحظر وكل واحدة ناوية تطرح طرحة صح وتسطرب علي باقي البنات
ماهو ماهر ولد خالة العريس اللي عايش في كندا بعث لأمه وقاللها أخطبيلي وهي تبي تخطبله من العرس ..
خوات العريس وبنات الجيران يوتوا في الخيمة ويرتبوا فيها ..
حوش العريس جايبين صدارات .. والزمزامات يبو مكان باهي كان هذا يروحوا ويخلوهم حطيطة ..
الدنيا نو ورطوبة تقتل ... الحمد لله اللي الخيمة مكيفة .. كميلة تكلم في سناء بنت عمتها ..كان هذا إلا ما يموتوا الصدارات قداش بيتحملوا .. حوايج وذهب علي قلوبهم ... هيا هي ليلة وتفوت إنشاء الله ..ردت عليها فاطمة بنت عمها .. الحمد لله كملنا هي خشوا يابنات وتوا روحكم راهو حوش العريس جايين بكري ..

هي كملي جليلة عييت ونهارك كان إديري عركة في العرس ..
ههههههههههه
حنيش شن صار في خيمة الرجالة ..

الحفيان
2009-03-28, 02:19 AM
منوره يا لجليله على هذه الموضوع الرائع ويعطيكى الف عا فيه:bb1;

حنيش المغامر
2009-03-30, 04:47 AM
المهم قعدت نفكر في الشيابين هديم شنو بديروو

المهم نط واحد منهم قااال وراس عمتك مريم ماهي صاايرة والتااني يقوال غير صلي عن النبي ياارجل مش هكي

واني في بالي نقوال هديم شنو يقوال بس وركبني الوسواس الحق رن التليفون هاااااااا ياا مريم واتي قاله اني جاااي خلاص

المهم في بالي شنو الي واتي زعمك شنووووووووو؟؟؟؟؟ قعد عقلي يقل ويجب والشاايب التااني يقواله والله مانك

ماشي هفت وقعمز شوي قاله ياااراجل مريم تراجي فيه ضروري نمشي واني نقوال هداء شنو الي في راسه بس

المهم من هنا من هناااااا ياااا عمي حمد خير وين ماشي قالي توا نجي مالك ومالي ايواااا الشاايب شكله انضر

شنو بدير في عقله المهم طلع اني في جرته الشاايب يمشي ويشبح وراء واني نخمد منه قلت والله ما مسيبك يا عمي حمد اليوم يا اني يا انت توا نوريك شنو تبي دير في راسك بس

المهم القيته عمتك مريم طاالعه بي هدكين الشكااير تاخد وتعطي عمك حمد شي من المشروب والحلويااات والحم

تقواله ياا حمد قلهن لي الحوووش توا نزيطوووو فيهن اني ويااك والعويل ههههههههههههههه

قعدت نضحك قلت ريت عمك حمد بالله عليه عمتي مريم تسرق في الدبش من الفرح هوا يخد ويجط في السياارة

مشيت قعدت نعيط بصوت عاالي يااا الجليله يااا دلوعه زززود راهو عمتك مريم وحمد زيطين في البش وانتاا ماتدرن عليه

المهم الجليله والدلووعه غطساات في الاداعه عااليه ويردبكن وماايدرن عليه

لين صووتي نبح من العيااط

كملي ياا الجليه ولا دلوعه شنو صاار بعد عطلكن سمعتني ولالالا

واو صوتي نبح

دهشت

هياا زودن

توا نجي اني نمشي نشد عمكم حمد بالك نخد منه شكارة ولا اتنين ماخلوو علايناا شي

حنيش المغامر
2009-03-30, 05:25 AM
ياااا الجليه يااا دلووعه دوريلي بنت اخطبيه لياااا راكن تنسااا بنت سمحه تكوون

علاي دوقكن ياااا بناات راهو تطلع شينه نسيبه يوم العر س ههههههههه

الجليلة
2009-03-30, 06:46 AM
قبل ما نبدو مع حنيش اكيد مرحبا بيك الحفيان بس مفروض كتبت معانا وشاركتنا الفرحة مش دايما في افراح في النتدى
ودمت طيب

الجليلة
2009-03-30, 06:58 AM
العفووووووووووو يا ربي صنة نعمة غير شن ها الجوع المهم كبستهم منوبة خالت العروسة
وجتها وقاللتها ايوا باش تردوا التبسي راهو ايجار شوي تغير لون وجه خالتك مريم وقالتلها ماهو الصغار في الحوش زي ما تعرفي ويستنوا في الغذي وبعت هالهم مع حمد قالتلها براس خشمها لا عادي غير ابعثي بس التبسي
وهوينا ايناس وكوكا وسارة يسووا في الكراسي والطاولات امتع المحضر والخيمة باردة ماهو مكيفة اجروها من الزوبي
المهم وهما يسوسوا في الكراسي فتحوا اغنية المجرودة صار عاد الرديح والرقص وصنة العرق قالبة الدنيا ههههههههههه
ماهو زي ما تعرفوا شهر 8 وشن فيه من حموا ورطوبه
خشت اسما وقالت اف اف شن ها الريحة شوي ناضتلها كوكا وقالت شن قصدك قالتلها شيئ غير صاحب العلة ينخصوه مرافقة
وطلعت من الخيمة ومشت للمزين ماهو حاجزة عند شبيلية وحالفة الما تنخطب في عرس ولد خالها
المهم قريب يجوا عيلة العروسة ومشت كميلة ادور في بيزون مالقتش قالت خلي نأجروا حتى ايجار هذا كله علي خاطر بدلة الجلوة ماهو عادات الطرابلسية لا يمكن تخطاها يوم المحضر لازم العروسة تتجلى فوق طاولة
وقالت يا ريتا اطيح وتنكسر رقبتها وهيا تتجلى
وووووووواك يا بنات راكم تنسوا حليب اللوز والعمبمبر في المحل ابعثوا مصطفى هوينا يسطرب برا بالسيارة
يمشي يجيبهم راهو الناس بدوا يجوا واني بنمشي نلهى بروحي وهوينا قيموا البكلاوة ع الصغار بدوا يسربوا فيها
حرام هكي عاد
وجيبوا الثلج من فريز خالتك رقية هوا والشكولاتا غادي سلم وخيتي استروني عااااااااااد
والعقبة ليكم ان شاء الله
هههههههههههههههه
يلا كملوا عيت

حنيش المغامر
2009-03-30, 05:46 PM
جليله شنو صار في البنت الي تبي تخطبيه ليا ولا دلوعه تبي تختارة ليا

دلوعة
2009-03-31, 01:31 AM
المهم ....
المعازيم بدوا يجوا والزمزامات وصلو .. خششوهم لحوش العريس باش يبوا يعشوهم ... حتى هما جايبين خالتك فاطمة أسباقيتي ... حطولهم العشي تعشوا وكملوا وناضوا باش يحموها ...
البنات كلهم لابسين لبس يهبل .. إيناس قفطانها مش عادي بكل ... والبنات الثانيين حتى هما لبسهم حلو وراقي ... لكن مش زي قفطانها ..
بدي الغني والرقيص وخالتك أسباقيتي رابخة .... وقالوا حوش العريس جو ...
وقفوا أخوات العريس وخالاته في باب الخيمة وقعدوا يستقبلوا في الناس .. اليوم يبوا ينستروا ياسر ليلة البارح الدبَة اللي مشت علي أعصابهم ...
المهم قعمزوا الناس وحطوا الصدارات في الصف الأول وخدوا من العزايز فراريشهم يطبقوا فيهم ..
وهذاك البخور يرقى لسابع سمي لين أخت العروسة شرقت وجابولها أمية وقعدوا يمروحوا عليها علي خاطر عندها حساسية ...
شوية وبدوا في تفريق الروزاتة والعبمبر ... إسمعي الصغار فوتيهم .. إسترينا مع الكبار قبل والصغار كل واحد تعطيه أمه من حصتها ... هذي كميلة طايرتلها الجيران والعيلة جايبين صغارهم كلهم ...{غم إن أصغر واحدة فيهم عمرها 25 سنة وعمرهم ما رفعوا معاهم عيل ..
المهم كملوا تفريق الروزاطة وخالتك فاطمة تغني في بو طويل ...
عيني علي شبح الذكر نكويها .. مسمار حامي لين يبرد فيها ...
طيح سعدهم هي فاطمة أسباقيتي مازال يجيبوا فيها .. ما أقدم سنينها ..ياريتهم جابو فرقة السنافر راهم قلبولهم الدنيا بدل غني العزايز اللي منكدين بيه علينا ..
هادي هبة بنت أخت العروسة ..
جتهم عمة العروسة وقالتلهم العروسة واتية باش تطلع في القفطان الكبير ..

كملي جليلة عييت ...
حنيش لقيتلك بنت تهبل لكن قالت شرطها الوحيد تسكنها في طرابلس ... ماتبيش تسكن في بوهادي .
هههههههههههههههههههههههه

حنيش المغامر
2009-03-31, 01:36 AM
حنيش لقيتلك بنت تهبل لكن قالت شرطها الوحيد تسكنها في طرابلس ... ماتبيش تسكن في بوهادي .
هههههههههههههههههههههههه

ههههههه عاادي تسكن معياا في برطاانيه

شنو المشكله منه اني نكلم الدراسه منه هياا بجني

شنو رايك ياا الجليله ياا الدلوعه اهم شي تعجبك ياا الجليله

الجليلة
2009-03-31, 01:56 PM
تبي الحق مغامر البنت طايشة شويا وخفيفة تعاركت مع نص المعازيم اللي في الخيمة علي خاطر الكراسي
هههههههههههههه
عاد المغامر قنين توا ندورولك اصبر انت بس غير اعبى علينا هههههههههههههه

وناضت خالتك فاطمة سباقتي تغني علي دليل العقل والع بيه وصلى الله وعليه

وبدوا في تفريق الشاهي ماهو مديرين محضر زمني ما يبوش يمدوا قاتو العالم والا النحلة
والصدارات ع الجهيتين مصلي ع النبي وعراجين الفل والله يا دلوعة خفت عليهم من العين بالذات وفاء بنت خالتك امنه الصلاة ع النبي زي الغزالة بالبدلة الكبيرة والصدرة طالعة عليها ورشقة الحولي والخناق الكبير الذهب مش فضة مبخوخة راهو
وناضت عاد ترقص علي ينجي خال ضراريا يرشق في الدولار عليا
شوي بدت تقرم فيها وحدة من المعازيم قالت غير شوفي الذهب مش ليها راهو كله متع امها راجلها مادياته عادية جدا وهيا مغلا عليها الطواقة وهذاكي وفاء رابخة في البدلة الكبيرة اللي فصوصها كريستال والخيمة كلها ناضت تتفرج علي رقصتها
ههههههههههههههههه
امشي وهيا ترقص عثرت قريب انكسرت رقبتها راهو العين حق ومحمد حق
ههههههههههههههههه
وكملت النوبة وجابوا العروسة بالربيبي عاد سباقتي والربيبي
وخشت
بالقفطان الكبير لونه من عام صفر مقدمه ستايله زمني والمكياج في طاعة الرحمان يدره الكبد مكيجتها بنت خالتها واخذة دورة قالوا
وام العريس تسحن وتلين قالت مشناها وليدي احلى منها بالف مرة
شوي عاد جت العروسة تترمى تبي تسلم علي ام العريس
شوي مدتلها روس صوابعها مش طايب عليها من ليلة البارح الدبا
وبدوا يغنوا الزمزامات عاد وناضوا عيلة العروسة يرقصوا فرحانين ببنتهم
والتعليق قالب الخيمة علي قفتان العروسة ومكياجها والتسريحة هههههههههههه

وهيا نخليك اني بنكمل طاسة الشاهي بردت في ايدي كلهم يغنوا ويصفقوا واني شادة جهازي ونطبعلكم شن صاير ههههههههههه
يلا كملوا عليا عاد

ابراهيم الورفلي
2009-07-20, 03:36 AM
http://www.ben4all.com/up//uploads/images/Ben4All-3feb42e44e.gif (http://www.ben4all.com/up//uploads/images/Ben4All-3feb42e44e.gif)

رموز
2009-07-20, 02:41 PM
مشكوووووورة اختي الغالية
الجليلة والله يعطيك الف عافيه